فيديو .. أسباب الريم الكثير عند سلق اللحم والحل مع الشيف محمد شحاته

عبر صفحته الشخصية علي موقع التوصل الاجتماعي علي الفيس بوك اوضح الشيف محمد شحاته ، أسباب الريم الكثير عند سلق اللحم والحل قائلا :

ليه اللحمه بيطلع منها ريم كتير ومهما شيلنا منها بتفضل موجوده وبتبوظ شكل وطعم الشوربه؟!

الإجابة بسيطة

- اللى بيعمل الريم ده هو عصارة اللحمة (المحتوى البروتينى "الاحماض الأمينية") ودى بتخرج فى مية الشوربة بكمية كبيرة لاكتر من سبب

- يا إما سيبنا اللحمة تفك تماما بعد ماخرجت من الفريزر وابتدت تتزل العصارة بتاعتها (اللى بنقول عليها مجازاً دم)

- يا اما بننزلها فى مية السلق وهى لسه بارده ما وصلتش لدرجة الغليان

الحل إن اللحمة تفك من التجميد لغاية ما كريستالات التلج اللى على سطحها الخارجي تدوب وسطح اللحمة يطرى من برة ، ولو كانت متقطعه لقطع صغيرة نحاول نفكها من بعض ماننزلهاش وهى كلها كتله واحده.

لازم تاخد صدمه حرارية سواء بالتشويح فى مادة دهنية او تنزل فى ميه وصلت لدرجة الغليان

بكده هانقفل أكبر قدر من مسام السطح الخارجي لها ونحبس العصارة جوة النسيج العضلى ومش هيخرجلنا فى مية السلق ويبتدى (يتخثر) ويغير لون وطعم الشوربة

بالطريقة دى هانحصل على مرقة رايقه وزى الفل واللى عايز يشوف أفضل طريقة لسلق اللحمة مع احلى طعم وريحة للشوربة