شويكار وماري منيب راجعين على تيك توك.. بنسخة جنة ولؤا!

حوار.. سها البغدادي

في زمن طغت فيه فيديوهات التريندات السريعة والضحك السطحي، ظهرت موهبتان صغيرتان قادرتان على إعادة الروح إلى الفن الأصيل بطريقة مبتكرة وممتعة.
جنة البرنس (15 سنة) طالبة في الصف الأول الثانوي، وشقيقتها لؤا البرنس (13 سنة) في الصف الثاني الإعدادي، قررتا أن السوشيال ميديا مش بس للترفيه... بل وسيلة لتقديم محتوى هادف يعيد بريق فنانين كبار زي "شويكار"، "عبلة كامل"، و"ماري منيب".
بمساندة الأسرة وخاصة والدتهن، بدأتا في تقليد مشاهد خالدة من التراث الفني، وحققن تفاعلًا كبيرًا على تيك توك ووسائل التواصل.

كان لنا هذا الحوار الممتع معهن لمعرفة كواليس البدايات، الصعوبات، أحلام المستقبل، ورسالتهن لجمهورهم الكبير

الحوار

س: ازاي بدأتوا فكرة تقليد الفنانين على السوشيال ميديا؟
جنة: كنا بنقلد مشاهد قديمة في البيت كنوع من الهزار، لكن مامتنا شافت فينا موهبة حقيقية وشجعتنا نبدأ ننزلها كفيديوهات.
لؤا: أول فنانة قلدتها كانت ماري منيب، وجنة بدأت بعبلة كامل، ومن هنا بدأنا نشتغل على الفكرة بجدية أكتر.

س: مين كان أول حد شجعكم؟
لؤا: مامتنا أكتر حد وقف جنبنا وشجّعنا جدًا، وكانت بتختار معانا الأدوار اللي نعملها.
جنة: وكمان عيلتنا كلها كانت داعمة ومؤمنة بموهبتنا.

س: هل لاقيتوا تفاعل من أول فيديو نزلتوه؟
جنة: بصراحة لأ، أول فيديو مكنش عليه تفاعل كبير، لكن بعد كده بدأ الناس يشوفوه وينتشر، واتعمله شير كتير.
لؤا: وبقينا نستقبل تعليقات جميلة جدًا شجعتنا نكمل ونقدم أكتر.

س: ازاي بتختاروا الشخصيات اللي بتقلدوها؟
لؤا: حسب كل شخصية مين فينا تقدر تقلدها بدقة. مثلًا أنا بعرف أقلد ماري منيب جدًا، وجنة بارعة في شويكار وعبلة كامل.
جنة: وبنشتغل كمان على اللبس والمكياج عشان يكون مناسب للشخصية اللي بنقدمها.

س: ايه أكتر شخصية بتحبو تقلدوها؟
جنة: بحب شويكار جدًا، وفي ناس كتير بيقولوا إني شبهها.وبعمل أدوار عبلة كامل وماجدة وفنانات كتير
لؤا: وأنا بعشق ماري منيب، وبحب كمان زينات صدقي وغادة عبد الرازق وسمية الخشاب.

س: بتحضروا إزاي للفيديوهات؟
لؤا: بنعمل كذا بروفة قبل التصوير، علشان نضبط تفاصيل الشخصية والمشهد.
جنة: ومع الوقت بقينا نعيد تصوير الفيديوهات عدد مرات أقل لأننا بقينا أكتر احترافًا.

س: إيه أصعب مشهد صورتموه؟
لؤا: دور الفنان إسماعيل ياسين في فيلم "الآنسة حنفي"، لأن المشهد كان صعب جدًا واخد وقت ومجهود.
جنة: كان لازم نقدمه بدقة علشان يوصل بنفس روح الكوميديا اللي عملها.

س: بتواجهوا تنمر أو سخرية من حد؟
جنة: أحيانًا في شوية تنمر، لكن ما بيفرقش معانا، إحنا عارفين إن اللي بنعمله محترم وهادف.
لؤا: وكمان صحابنا في المدرسة بيشجعونا جدًا.

س: لو اتعرض عليكم تمثلوا في مسلسل... توافقوا؟
الاثنين: طبعًا نوافق! ده حلمنا، ونحب نمثل مع الفنانة ياسمين عبد العزيز، وكنا نتمنى نمثل مع عبلة كامل.

س: ازاي بتوفقوا بين الدراسة والتيك توك؟
جنة: أيام الدراسة بنقلل من التصوير، وبنصور فيديوهات كتير في الإجازة ونخليها محفوظة ننزلها وقت الدراسة.
لؤا: والدراسة عندنا أهم من أي حاجة، لأنها اللي هتوصلنا لأحلامنا.

س: بتحبوا تقولوا إيه للناس اللي بتابعكم؟
جنة: بنحبهم جدًا وبنشكرهم على دعمهم، وإن شاء الله دايمًا نكون عند حسن ظنهم.
لؤا: وبنقول لأي حد عنده موهبة: خليك ورا حلمك، متخليش حد يحبطك، وطور من نفسك دايمًا.