أيمن الرمادي المدير الفني لنادي الزمالك
مباراة بتروجت مهمة جدًا بالنسبة لنا، وبنعتبرها استعداد قوي لماتش بيراميدز في نهائي كأس مصر. الفريق بيشتغل كويس قوي علشان مباراة بكرة، وفيه حاجات إيجابية كتير اتحققت في الفترة اللي فاتت. إن شاء الله الصفوف تكتمل، خصوصًا مع الإصابات اللي عندنا، وبإذن الله كل اللاعيبة ترجع خلال أسبوع تقريبًا
كنا مخططين إننا نعمل معسكر ٤ أيام، لكن لظروف معينة قصرناه ليومين في الإسماعيلية، والمعسكر كان مفيد جدًا للفريق. لازم نتعامل مع كل المستجدات، وإحنا ماشيين بخطوات كويسة علشان الفريق يظهر بأفضل شكل ممكن
اللاعيبة عندها دوافع، من غير أي مبالغة. جمهور الزمالك عايز يشوف اللاعيبة بتجتهد وتظهر بشكل كويس، وده في حد ذاته دافع كبير. وكمان إن الزمالك محتاج يخرج من الموسم ده ببطولة، واللاعيبة عارفة قيمة النادي كويس جدًا
الإصابات اللي عندنا صعبة جدًا، ودي مش مسؤولية الجهاز الطبي. المسؤول الوحيد عن الإصابات هو كثافة الحمل البدني اللي حصل. أنا لما مسكت الفريق لقيت إن فيه حاجات بعيدة عن الجهاز الطبي هي السبب، حاجات فيها خلل ولازم تتصلح وإحنا بندفع تمن تراكمات موسم كامل
أنا باحترم كل الآراء، لكن لازم نشتغل بدقة أكتر علشان اللاعيبة متبقاش عرضة للإصابة. وببرئ ساحة الجهاز الطبي تمامًا، لإنهم اتعرضوا لهجوم كبير وأنا مش من نوعية الناس اللي بتحب ترمي اللوم على حد وأنا المسؤول عن أي حاجة في الفريق، ومسؤوليتي أحمي الأجهزة اللي بتشتغل معايا
رجوع اللاعيبة المصابة مسؤولية كلنا، وأعتقد إن محمود جهاد قريب يرجع، وبالنسبة لأحمد الجفالي، هنتابع حالته في الفترة الجاية ونقيم موقفه
بالنسبة لشيكابالا، أنا بحب اللاعب اللي ليه قيمة جوه الملعب. اللاعب الموهوب اللي لمساته بتفرق في الملعب، بيفرق معايا شخصيًا، وده شيء كويس
