اسمه الحقيقي محمد شوقي شامخ

اسم الشهرة ::- شوقي شامخ
كعادة اغلب الأهالي زمان كانوا شايفين إن التمثيل ده شغلانة ما تأكلش عيش ولا ليها أي قيمة في المجتمع .. عشان كده "شوقي" رغم انه كان من أفضل الممثلين في فريق التمثيل بجامعة عين شمس لكن بعد ما تخرج من كلية التجارة حصل على ماجيستير إدارة أعمال واشتغل فترة كمحاسب في وزارة التربية والتعليم إرضاءاً لأسرته
شوقي فضل يسعى دايماً
وظهر في أدوار بسيطة لكن أول دور كبير له
كان في مسرحية "شاهد ما شفش حاجة" مع عادل امام ودي كانت شرارة الإنطلاق في التليفزيون وظهر في مسلسل "الشوارع الخلفية" واللي نال دوره فيه إعجاب اسرته اللي كانت رافضة فكرة التمثيل من الأساس
بعد شوية أصابه الملل واليأس من تأخر شهرته في مجال الفن عشان كده سافر للجزائر
وبدأ يدرس المسرح
وكان بيفكر يستقر هناك
لكن اللي أقنعه بالعدول عن الفكرة دي والعودة لمصر
كان الكاتب الكبير أسامة أنور عكاشة واللي اشتغل معاه بعد كده مجموعة من أفضل أعماله وأشهرها على شاشة التليفزيون زي "ليالي الحلمية"و"ارابيسك"و"زيزينيا"
ارتبط شوقي شامخ بالسيدة "سيفين صلاح الدين" مقدمة البرامج ومذيعة النشرة الاخبارية الفرنسية "Le Journal" اللي كانت بتيجي يومياً على التليفزيون المصري وخلف منها "أحمد" واللي حالياً بيشتغل كممثل و "بيرين" اللي بتشتغل برضه مذيعة في التليفزيون المصري ده غير ان اخوه "احمد شامخ" كان صحفي
من أقرب أصدقائه النجوم أحمد زكي وصلاح السعدني والمخرج ‏جمال عبد الحميد والكاتب أسامه أنور عكاشة
توفي شوقي شامخ وهى بيصور الجزء التاني من مسلسل "المصراوية" وكان أصيب بجلطة وتم إيقاف تصوير المسلسل لحد شفائه وتم إستئناف التصوير بعدها لكنه أصيب بأزمة قلبية دخل على أثرها العناية المركزة وتوفي بسبب ضعف عضلة القلب وزيادة نسبة المياه في جسمه
عشان يرحل في 26 مارس 2009 قبل ما يشوف دوره في المسلسل وكمان قبل إستكمال مشاهده في فيلم "لمح البصر" اللي اتعرض سنة 2012